الكرتوش في سمانا يخيط و لميمة علينا قلبها نار

الدم في التربة الغالية سايل والهروب علينا أكبر عار

لكلنا ستنينا برشا عوام و عشقنا كبر و زاد لهل النهار

لكلنا حبينا شعبنا يثور و يقوم على الظالم كي الموج الهدار

يخرج يعيط و ينادي و يصيح يزي فك أخرج علينا يا غدار

يا خاين شعبك المسكين اللي سكت رغم اللي لكلو ثوار

ياهارب من بلادك بعد العز وفي بلاد الناس كي الفار

اغزر مليح لشعبك اللي من رماد وللى نار

يالميمة ماتبكيش عليا راني تونسي ولد هالبلاد

يالميمة أمسح دمعتك خليني علاهم بصدري هاد

هالتراب مهما سال فيه دم يبقى ديما أخضر ولاد

متنا و عشنا و حزنا و تغلبنا و هو باقي في الحكم شاد

قلوبنا تحرقت و امالنا تبخرت أما عمرنا ما سلمنا في البلاد

بلادنا اللي ولات عامرة بالقفاف و اللحاس، بالمنافق و القواد

لا حشم لا فهم سيادتو مواصل بكل حزم حاط وجهو و ماد

اخرج علينا، فكنا و يزي من سرقة فلوسنا و مالفساد

يالميمة راهو حبنا ليك حب كبير مايتوصفش و مايتحكرش

نتذل، نتضرب، نموت ميات مرة اما نقعد و مانهربش

كرهنا القوادة و اللحاسة و اللي من غير ضمير واللي مايرحمش

كرهنا رواحنا مالظلم و القهر قداش من واحد في الحبس وهو ماسرقش

سكتنا و تحملنا و بلعنا السكاكن بالدم اما عمرنا ماننسى و مانفلتش

الثورة قامت و الشعب خرج و تكلم و عيط، شعبنا راهو ما يتغلبش

ثورة شعبنا العزيز, ثورة الكرامة و موش الياسمين التاريخ مايتفسخش

يا تونس يا غالية نحبوك يا آمنا يا حنينة صبرت علينا لين طردنا الوبش